«Qazmedıa ortalyǵynda» elimizdegi buqaralyq aqparat quraldaryna arnalǵan «Astana Media Week» aptalyǵy bastaldy. Jıyn Aqparat jáne kommýnıkasııa mınıstrliginiń uıytqy bolýymen Qazaqstannyń rýhanı jańǵyrýynyń negizgi basymdyqtaryn oryndaý maqsatynda uıymdastyryldy.
Medıa aptalyqtyń ashylý saltanatynda kirispe sózin sóılegen Aqparat jáne kommýnıkasııa mınıstri Dáýren Abaev tuńǵysh ret ótip otyrǵan mundaı shara eldegi medıa naryǵyn qalyptastyrýǵa jáne damytýǵa qosar úlesi zor ekenin aıtty.
«Elbasy Nursultan Nazarbaevtyń arnaıy tapsyrmasymen salynǵan «Qazmedıa ortalyǵy» aldaǵy ýaqytta aımaqtaǵy yqpaldy medıa hab retinde úlken ról atqarmaq. «Astana Media Week» osy ortalyq aıasyndaǵy biregeı medıa alańǵa aınalady dep senemiz. Búgingi sharanyń basty maqsaty otandyq naryqty damytýdan bólek, mádenı jáne aqparattyq baılanystardy tereńdetý», – dedi D.Abaev.
Birneshe kúnge sozylatyn jıyn barysynda sıfrly tehnologııalardy damytý, óńirlik BAQ-tyń máseleleri talqylanady. Mınıstrdiń aıtýynsha, mundaı jıyndar qatysýshylarǵa ozyq tájirıbelermen tanysyp, sheberlik shyńdaýǵa jáne jańa tehnologııalardy el ıgiligine paıdalanýǵa berilgen úlken múmkindik. Sonymen qatar, D.Abaev is-sharanyń óńirlik kommýnıkasııalardy, medıa salasyndaǵy seriktestik qatynastar men halyqaralyq yntymaqtastyqty damytýǵa eleýli úles qosatynyna senim bildirdi.
Medıa aptalyqtyń alǵashqy kúni efır taratatyn medıa ókilderine arnalǵan. Onda medıa óndiristiń keleshegin talqylanyp, dıalog pen kelissózder alańy, birqatar master-klastar ótkizilip, paneldi pikirtalastar ótedi. Jıynnyń ekinshi kúni Astana Digital Forum degen jalpy ataýmen sıfrly marketıng quraldary, krıptovalıýta naryǵyna sholý sekildi birqatar máseleler jóninde pikir almasyp, spıkerler sóz sóıleıdi. Medıa aptalyqtyń sońǵy kúni Aqparat jáne kommýnıkasııalar mınıstrligi baspa naryǵynyń damýynyń eń ótkir máselelerin, jańa konvergentti túrge ótý kezindegi qıyndyqtar men múmkindikterdi talqylaıtyn BAQ-tyń óńirlik forýmy ótedi.
Abaı ASANKELDIULY,
«Egemen Qazaqstan»